«O evento contó con a presencia de miembros destacaus d´o Rotary Club y d´o Círculo Catalán en Madrid. »
O autor d´o libro, o historiador Joaquim Montclús i Esteban, destacó en Madrid a proyección internacional d´iste teruelano que impulsó importants avances e infrastructuras en a primera metat d´o sieglo XX.
Incheniero, empresario y político, Carlos E. Montañés (1877-1974) ha estau una figura tant important como poco conoixida. Por ixo, o historiador Joaquín Monclús i Esteban ha rescatau a suya biografía en o libro Carlos E. Montañés. Catalán y aragonés, un personache fundamental en a construcción d´a España moderna, editau por Fundación Aragonum y que se presentó o pasau 21 de noviembre en o Congreso d´os Deputaus de Madrid.
Autor y protagonista d´o libro comparten orichen familiar. A localidat turolense de Calaceite, en a comarca d’o Matarraña, i veyó naixer a Montañés, que estió d´incheniero chefe en a Compañía de Tranvías de Barcelona. Bi abogó por a electrificación d´o servicio y a sustitución d´os caballos. Tamién treballó en a creyación de centrals hidroelectricas ta electrificar a industria de Barcelona; y en a construcción d´un ferrocarril que conectase a capital catalana con a comarca d´o Vallès.
Antimás, d´a man d´o incheniero estadounidense Frederick S. Pearson fundó a empresa conoixida como La Canadiense, oficialment Barcelona Traction Light and Power, esencial en a electrificación de Cataluña y o desembolique social y economico d´a rechión y o país. O carácter emprendedor de Montañés le levó t´a fundación de Ferrocarriles de Cataluña, chermen d´os Ferrocarrils d’a Generalitat actuals. En 1947, creyó a sociedat Filovías Reus-Tarragona y Extensiones, SA (Firtesa) con l´obchetivo d´explotar a concesión d´os trolebuses entre Reus y Tarragona, una línia de transporte que estió operativa entre os años 50 y 70.
A partir de 1915, Montañés s´inició en a politica y, dende 1916 dica 1923, estió eslechiu deputau en Cortes. Estió gubernador civil en 1919, deputau d’o Congreso por Teruel, y president d´o Círculo Catalán de Madrid.
“A suya historia ye tamién una historia de superación, de cómo en momentos complicaus se puet continar treballando por avanzar y por aconseguir logros que conlleven milloras colectivas”, tal y como destacó en a presentación Guillén Manuel Forcada, president d´a fundación Aragonum.
O evento contó con a presencia de miembros destacaus d´o Rotary Club y d´o Círculo Catalán en Madrid, en cualo orichen tamién estió decisiva a fegura de Carlos Emilio Montañés. En a mesa d´a presentación participó concretament o gubernador d´o Districto 2201 d´o Rotary Club Madrid Serrano, José Miguel Gonzalo; y Albert Masquef, expresident d´o Círculo Catalán en Madrid. Antimás, tamién adedicó unas palabras o delegau d´o Gubierno d´a Generalitat en Madrid, Joan Capdevila i Esteve.
Con iste libro se ha quiesto dar visibilidat y reivindicar l´Aragón que fabla catalán, como ye o caso de l´autor, Joaquim Montclús. Y a presentación ha estau tamién un altavoz ta l´activismo cultural de Fundación Aragonum, editora d´o libro, y o Ligallo de Fablans de l’Aragonés.
