Andrés Castro Merino
Lo te segundío en todas las mías cartas, cualsiquier boca-i-nuei, crebaré las lineas de lo tuyo orizón, con lo mío barco, pa amanar-me a tú, y escalfar lo tuyo corazón, con la mía voz de marinero.
Lo carro d’a crompa, será pleno de bieras. Cuan plegue a casa mía, buscaré un discopreto, con una güena banda sonora, y anque dizes, que t‘importo un perreque, agún asinas, te i trucaré, por si as olbidau, que la zaguera vegada, qu’ébamos estau chuntos, m’escabullí, porque m’espanta lo compromís. Soi pensando de qué color estarán los tuyos texanos.
Arrimate, estoi un arbol con mazanas, pero sin serpiente. Afunde las tuyas mans, los tuyos labios, en las mías radizes, y tornaré a florexer, gracias a la dulza escuma de la tuya boca. Abrazame, como si estiese un ombre, pleno de frio y sin abrigo.
Isabel, si bel diya, yo estiése pa tú, sólo que una boira de fumo, que s’esbafa, risas y parolas en desorden, sin saper si puyan o baixan. Ricorda, pa yo, una nuei sin los tuyos besos, ye lo mesmo, que una pedregada en la güerta, una astral, fendo sangre en la arbolera.
Baixo los linzuelos las mans creman. Cada segundo, ye más gran la fambre y la sete. Una a una, borro las tuyas rugas, (ya mos se marchó lo tiempo, en que t’encorreba, como lión dezaga d’una gazela). Lo que perén abita a lo mío estomaco, ye, lo bazío de la tuya ausencia. Por ixo, dende lo lusco-lusco, dica que lo luzero de l’alba, mos dispierte de lo suenio, seré abrazau a las tuyas caderas, como ave de presa.
Por ista casa nuestra, navatía, la mía compañera, una muller bonica, de tetas chicotas. Toz los diyas, cuan se fa de nuei, preta fuego a las velas, d’eras surte un fumo fino, cuasi invisible, con oloría a luz de luna.
Dende que mos conoxiemos, bam dizir. Lo nuestro aimor estará largo, largo, los nuestros abrazos, tendrán la fuerza d’a liedra, cuan embolica lo tronco d’un arbol.
Yera yo a lo chardín, surtiés a lo balcón con los piez escalzos. Pa, que no se i dispertasen los nirnos, me gritastes en voz baixa. “Entra y puya, me trobarás espullada, y no bi abrá resistencia”.
