Sonia Gutiérrez Giménez.
Aquer maitín, amaneixió plevendo, un diya triste, griso…. Feba ya tiempo que o corazón d´Alodia tamién yera asinas: triste, fredo, griso… Se devantó, se duchó, desayunó un café de piet y tanimientres i plegó a muller que cudiaba d´os suyos fillos ta que ella se´n ise a treballar.
Dentró en a cambra d´os ninons, los besó en a frent y se los miró. ¿Qué podeba dar-lis, d´ella mesma, si yera vueda? Os suyos uellos se plenoron de glarimas y, atra vegada ixa sensación d´afogo plenó ro suyo peito, sospiró profundament, ixugó as suyas glarimas y zarró a puerta d´a cambra.
Se despidió d´ixa muller que se quedaba en casa suya y en salió ta ra carrera.
L´orache yera fresco y humedo, feba ulor a fumo, a fabricas, a porquería… pilló ro suyo auto ta ir-se-ne ta o suyo treballo que yera prou luent de casa suya. Pero… ¿qué feba ella en ixe puesto? ¿se mereixeban os suyos fillos y ella mesma ixa vida?, una vida rebutient de prisas, de reloches, una vida en do mancaba o tiempo ta redir, ta soniar…., y sobraba tiempo de treballo, d´estrés, de luita por sobrepervivir….en un puesto an denguno no se conoixeba, denguno no s’aduyaba y a on ni se sabeba quí teneba de vecín.
Plegó en o suyo treballo y se i cambeó a ropa de carrera por la de treballo; dimpués fichó con ixa tarcheta que la identificaba con un numero. ¿Ixo yera ella? Sí, un numero más en una ixena, un numero más ta producir un diya, y atro…. Un numero más en o mundo.
En levaba bels poquez de meses treballando en ixa fabrica, dende que as cosas con o pai d´os suyos fillos yeran mal, dende que o desamor engaronó ro suyo corazón. Heba asperau por si as cosas s´apañaban, no quereba que os ninons sofrisen una deseparación, pero plegó un inte en que tot yera inútil, l’amor lo mueve tot y cuan l’amor s´amorta, tot ye aturau y plega la fin. Estioron meses duros, de muitisma luita interior, de luita por os diners, por a casa, por os ninons, estió tiempo de creticas, más que más por parti d´a suya familia, que no replecaban cómo heba pasau ixo, cómo ella yera capable de itar tot a perder, de dixar un mariu tan perfecto…, de darlis a os suyos fillos un desgusto tan gran, ¡qué mala mai, qué mala filla, qué mala persona!, ¡qué triste!, no la conoixeban… Estió un tiempo muito duro y muito triste, pero pareixiu a o tiempo en que yera vivindo agora.
Ella sabeba que a suya traza d´estar, y de pensar, yera diferent a la resta d´a chent, pero ixo no la feba estar pior ni millor, puet estar que li u lis cuacase u no, pero ixo yera asinas, denguno no podeba cambear-la.
Yera una persona encara chovena que heba viviu ascape, s´esposó chovena, estió mai chovena y agora, ya teneba a las suyas añadas muito camín recorriu.
Prexinaba un mundo ideyal, an l´amor estase lo más important, l´amor por a chent, por os animals, por a naturaleza, por tot o puro… A la fin que o mundo estase dominau por l´amor a tot o que Dios nos donó, y yera platero que o suyo mundo yera muito lexano d´ixe que ella prexinaba.
Sabeba que o suyo ideyal yera un imposible, pero deseyaba que a suya vida estase lo más pareixida a ixo que tanto angluciaba. Quereba fuyir de complicacions, de malas chents, que nomás creyaban malas vibracions, quereba paz, paz interior, bella cosa que agora no´n teneba.
Alodia se pensaba que, de seguras, cuan naixemos cadagún tenemos una misión y que en cada vida que tenemos, hemos d´amillorar a la anterior dica arrivar a estar un ser de luz. Ella sabeba que talmén a ra suya alma le quedaban poquetas vidas t´alcanzar a estar ixe ser puro, y quereba aduyar-la a plegar en ixa pureza.
Por ixo se´n feba muito por todas as cosas y personas con las que se trobaba en a suya vida, yera bella cosa que no podeba evitar, li naixeba d´aintro, prebaba de fer a vida lo más agradable posible a la chent que conoixeba, se pensaba que as personas que se cruzan en o nuestro camín son destinadas a alportar-nos cualcosa, y nusatros hemos de corresponder-las; se pensaba que denguna cosa ye porque sí, tot tiene un sentiu, cada trobada con belún, cada situación, cada pregunta, cada respuesta… Tot nos ocurre por bella cosa que tiene un sentido dillá de lo comprensible ta muita chent, y que cadaguna d´ixas situacions cal aproveitar-las porque se nos dan ta ixo: ta aproveitar-las, t’aprender, t´amostrar; por ixo cal estar a l’atisba de siñals que a vida nos ne mete debant de nusatros. Toz son obra de Dios, nomás que d´El, y nusatros cal que le responda-mos, fendo-les caso y estando seguros de que si actuamos debant d’els con amor, y con tot o nuestro corazón, Él nunca no nos chuzgará mal, porque nunca no chuzga, sino que nos enseña a fer decisions. O que ye cierto ye que, mientras que no faigamos mal a denguno, semos libres ta fer caso a o nuestro corazón y a os nuestros sentimientos.
Asinas pensaba Alodia, por ixo, como a vida l´heba amostrau, ella feba caso a ros siñals que dende o cielo li´n mandaban. Ixa traza de pensar, -y d´estarfeba que a muita chent se le fese rariza, atra chent s’aproveitase d´ella –cosa que no l’importabaya que “bueno, cadagún ye como ye, y si les he feito bien…” se pensaba, y que estase atra chent que l’apreciaba de corazón, cosa que la feba muito goyosa porque veyeba que bi heba chent, que mereixeba a pena de conoixer millor, y aduyar-la si estase menester.
Plegó l´inte en que discansaba ta chentar y en aquer minchador d´o suyo treballo, perén bi heba periodicos ta leyer, con poquet intrés, en pilló un d´els y escomencipió a veyer-lo; tanimientres, se minchaba un entropán de no sabeba qué cosa, pues lo heba mercau en aquera maquina d´entropans que bi heba en o minchador, ya que no li vagó a nueit d’antis de fer-se una buena chenta.
Asinas que entre que mascaba aquer entropán de sabor indefiniu, li clamó l’atención un anuncio que deciba: ¿quiers cambear a tuya vida?, si te fas ganas de treballar, quiers fer a tuya casa y tener un treballo, truca-nos: amenistamos de chent como tú. Tel…
De tot l’anuncio, o que más le clamó l’atención estió ixo de “¿quiers cambear a tuya vida?” Sin saber por qué, dixó lo entropan en a mesa, y retalló o trozet d´o periodico an yera l’anuncio, y lo ficó en a suya pocha. Yera rarizo, a garra noticia d´aquer periodico no l’heba feito atención, nomás que ixe: heba estau como si una luz l’hese iluminau. De seguras que yera un siñal, ¿caleba fer-le caso? Profes que sí.
Dixó ixe entropán que pareixeba una masa de cualcosa sin sabor y se debantó d´a mesa ta continar treballando, pero solo que una frase teneba en o suyo esmo: “¿quiers cambear a tuya vida?”
Remató a suya chornada en o treballo, i tornó a fichar con aquera tarcheta que la definiba como a un numero, se cambeó de ropa, y en salió ta la carrera. Yeran as cinco d´a tardi, continaba plevendo, pero feba calor, una calor apegallosa que chunto con a humedat, afogaba.
Dica casa suya teneba meya hora, y dimpués atra meya hora, con muitisma suerte, t´ aparcar l´auto. ¿Cómo podeba malmeter o suyo tiempo en dixar o suyo auto en una carrera que, de seguras, estaría antimás asabelo de leixos de casa suya? No lo sabeba pero yera asinas, d´autos bi´n heba tantos, que yera a saber que difícil de trobar un puesto an que dixar-lo sin o periglo de que a l´otro’l día no bi hese un papel rosa en o cristal, u sin que estase leixos de casa suya.
A la fín, dixó o suyo auto en una carrera a unos cinco minutos de casa suya, heba teníu suerte: yeran as seis d´a tardi.
