Entrevista a ra suya Diretora Iris Orosia Campos Bandrés
Diplomata en Machisterio, Lizenziata en Umanidaz, Doctora en Educazión e profesora permanén en l’aria de Didautica d’a Luenga e d’a Literatura d’o Departamento de Didauticas Espezificas d’a Universidad de Zaragoza. Adedicó a suya tesis doctoral a ro estudio d’a situazión e perspeutibas de l’aragonés en as escuelas d’o territorio de l’Alto Aragón, a trabiés de l’abaluazión d’os resultatos d’o modelo d’amostranza implementato entre 1997 e 2015 e d’as autituz lingüisticas d’a comunidá educatiba. Ha publicato paso de 50 articlos, capitols e atros treballos zientificos binclatos a ra Soziodiautica d’as Luengas, a más gran parti adedicatos a l’aragonés. Tamién ha diseñato materials ta l’amostranza de l’aragonés en etapas como E. Infantil, E. Primaria e E. Secundaria. Autualmén coordina ra Menzión en Luenga Aragonesa que s’imparte en os titols de Machisterio d’o Campus de Uesca, en do tamién ye direutora d’o Diploma d’Espezializazión en Filolochía Aragonesa. Dende 2020 preside o Rolde de Estudios Aragoneses e en 2022 estió nombrata direutora zientifica d’o Zentro d’interpretazión de l’aragonés “Ana Abarca de Bolea”.
Cuál ye l´ochetivo d´o DEFA, dende una anvista academica e dende una anvista aragonesa?
L’ochetibo d’o Diploma d’Espezializazión en Filolochía Aragonesa, en estar un títol unibersitario, ye meramén academico. Dende a suya primer edizión, en o curso 2011/2012, o suyo ochetibo prenzipal ye estato ufrir una formazión espezifica a ro profesorato d’aragonés en libels no unibersitarios, si bien entre os suyos potenzials destinatarios tamién se troban os profesionals d’instituzions culturals u de meyos de comunicazión.
Qué instanzias u presonas han ayutato dende a Universidat ta que salise enta debán?
O curso 2021/2022 s’ha desembolicato ra onzena edizión d’o DEFA e bi ha bellas presonas –tanto dentro como difuera d’Unizar– que han feito un treballo firme ta que tot iste camín que emos feito siga estato posible. En a creyazión d’o DEFA estión embrecatos más que más o Dr. Francho Nagore Laín, qui ye estato ro direutor d’o títol dica ra suya chubilazión o curso pasato, e ro Decanato d’a Facultad de Ciencias Humanas y de la Educación d’o Campus de Huesca. Cal acobaltar o gran refirme d’iste zentro a l’aragonés, que ha feito que se plegase a baltizar a ro Campus de Uesca como “Campus de l’aragonés”.
Iste refirme s’ha feito ebidén en a creyazión d’o Diploma en o curso 2011/2012, pero tamién en a creyazión d’a Menzión en Luenga Aragonesa dentro d’os estudeos en Machisterio, d’a que en o curso 2022/2023 saldrá ra terzera promozión de mayestros e mayestras con espezializazión en Luenga Aragonesa, una fita que no ese estata posible sin a empenta d’o equipo decanal d’iste zentro.
Antimás, cuasi dende o prenzipio ro DEFA contó con a colaborazión d’a Diputación Provincial de Huesca, que conzede una beca a toz os estudians de cada promozión con a que aconseguimos que ro pré d’a matricla siga muito más baxo. L’aduya d’ista instituzión ye estato atro d’os nuestros alazez durante ista decada. E tampoco no cal xublidar a faina desembolicata por o profesorato; belunos/as dende o prenzipio e atros, como yo mesma, dende más entabán. Agora mesmo femos parti d’o equipo dozén: Carlos Abril, Pilar Benítez, Antón Eito, Luzía Fernández, Ana Giménez, Francho Nagore, Chusé Inazio Nabarro, Paz Ríos, Chesús Vázquez e yo mesma.
Qué esferenzia bi ha entre un Diploma como iste e un Máster?
Poderba convertir-se en un Máster? A esferenzia entre un titol de Diploma e uno de Máster ye, más que más, o numero de créditos que conforman o suyo programa d’estudeos. Un Máster ha de tener a ro menos 60 ECTS, e ro DEFA en tiene 37. Con tot e con ixo, una d’as demandas que más se repiten en as encuestas que femos a ra fin de cada curso ye que s’enample ro títol a un Máster e mesmo que siga un Máster de dos cursos. En o curto plazo no pensamos en ista posibilidá, pero sí que ye una custión que, antis u dimpués, caldrá planteyar. En zagueras sí que emos atendito a atrás sucherenzias que se repetiban –tanto entre os nuestros estudians como entre chen intresata en cursar o Diploma–, como l’asistenzia a ras clases online.
Qué mena d´alumnato ez tenito en o Diploma?
A más gran parti d’os estudians gosan estar mayestros/ as, profesorato de E. Secundaria e titulatos/as en filolochía u atras carreras de l’aria d’as umanidaz. Con tot e con ixo, toz os cursos tenemos tamién buena cosa de perfils una mica más espezials, como periodistas, incheniers u mesmo meches. Con tot e con ixo, istos estudians con un perfil más “especial” gosan estar presonas con un contauto amplo con l’aragonés como miembros de coleutibos e asoziazions culturals adedicatas a ra suya difusión.
De qué reconoximiento agoya o DEFA dende l´anvista ofizial (puntos oposición, idioma)?
Dende o curso 2021/2022 o Diploma ye reconoxito como libel B2 seguntes o MCER en toz os prozedimientos combocatos u finanziatos por o Departamento de Educación, Cultura y Deporte de la Comunidad Autónoma de Aragón cuan se desichan balorazions referens a ra competenzia en idiomas u istos sigan requisito u merito en ditos prozedimientos. Antiparti, o DEFA tamién s’ha computato tamién en o trestallo correspondién ras autibidaz de formazión en os meritos d’os concursos d’oposizión de mayestros/as.
Cómo paraz a dozena edizión, correspondién a o curso 22/23?
Con tota ra ilusión de siempre, como ye de dar, e con a mesma rasmia con a que emos treballato toz istos cursos. Como nobedaz: plegamos d’enguerar o reconoximiento d’o títol como libel B2 – como plego de comentar–, tamién a formazión en streaming a trabiés de bidioconferenzia en direuto, e ro curso benién feremos, antimás, un chiquet ziclo de conferenzias que s’ubrirá a ro publico cheneral en tres calendatas: prenzipio e fin d’o curso e Día Internazional d’a Luenga Materna.
Qui quiera más informazión sobre o DEFA, en dó tos puede trobar?
Tota ra informazión sobre ro programa d’estudeos, os criterios d’admisión e ros plazos de preinscripzión e matricla se pueden trobar tanto en a web d’a Facultad de Ciencias Humanas y de la Educación (https://magister.unizar.es/estudios/ diploma-de-especializacion-en-filologia-aragonesa) como en a web d’o DEFA (https://filologiaaragonesa.es/). Antimás, qui ameniste informazión tamién puede escribir-me a l’adreza icamposb@unizar.es.
Dende ro día 1 de setiembre será ubierto ro segundo plazo de preinscripzión en a edizión de 2022/2023, por o que qui siga intresato/a encara ye a tiempo de preinscribir-se.
