Autor: Chusé Raúl Usón Editor, traductor, escritor e investigador
Irene Vallejo ye l’autora d’o mayor fenomeno literario d’estos zaguers anyos: l’asayo El infinito en un junco. A Vallejo la hemos vista creixer como escritora en bien poco tiempo e convertir-se en tot un referent literario pa mils de personas. La publicación d’o suyo asayo ha suposato la mayor campanya de defensa d’a cultura grecolatina, la reivindicación d’o libro como ferramienta de transmisión de conoiximiento, como companyero inseparable d’aventuras, e, de momento, ha amillorato e superato totas las campanyas institucionals de fomento e d’animación a la lectura. Ha tornato a trompatalega la ilusión a muitos lectors e defensors d’a lectura e d’o libro. E chusto en un momento crucial, quan pareixeba que lo libro fisico yera condenato irremisiblement.
E s’ha publicato a quasi quaranta idiomas, incluíndo dende agora mesmo l’aragonés, eixa lengua que pa muitos no existe, u ye d’abarcudos e cal deixar que muera d’inanición perque ye inútil, innecesaria.
Fue l’anyo pasato, pa agosto, en a Feria d’o Libro de Chaca, quan lo editor de Contraseña, Alfonso Castán, así como Irene m’ofreixioron la posibilidat de traducir e publicar Lo infinito en un chunco a l’aragonés. La mía primer reacción fue de sorpresa, de perplexidat, no lo negaré, pero decamín vide, que a pesar d’estar una gran responsabilidat e un gran treballo que me demandaría muitas horas e mals de cabeza, yera una oportunidat unica pa dignificar la nuestra lengua, de meter-la a la mesma altura que atras ya estandarizatas e normalizatas e de contribuir, con a mía traducción, a dotar l’aragonés d’un buen modelo de lengua literaria.
He de decir que tanto Vallejo como la suya achencia literaria han dato totas las facilidaz pa asumir este reto. L’autora determinó d’arrenunciar a es suyos dreitos d’autora en a primer edición (1000 exemplars) e quiero agradeixer aquí publicament este detalle de chenerosidat e de carinyo per la suya part.
Pa fer la traducción m’ha feito muita honra la mía experiencia e lo conoiximiento de l’aragonés adquirito a lo largo de trenta e ueito anyos: leyendo tot lo que existe en e sobre l’aragonés, tanto monografías dialectals como tesis sobre l’aragonés, articlos sobre l’aragonés medieval, autors dialectals, e més que més, fendo treballo de campo e aprendendo e incorporando a lo mío bagache tot lo que he sentito a cientos de personas, a traviés de charradas e enqüestas.
Pa ello m’he basato en l’aragonés que he ascuitato siempre en boca d’es parladors d’aragonés, principalment de Sobrarbe, pero tamién he quiesto tener una visión de conchunto, d’alica, dende l’aire, mirando de trobar un modelo de lengua literaria, aleixata d’es caprichos lingüisticos, de localismos e d’inventos recients. He quiesto, a la finitiva, que resonasen es ecos de totas las voces d’es altoaragoneses que en toz estos anyos m’han acompanyato, que se i sienta la suya parabla, e que no se sientan nunca defraudatos ni traicionatos.
Las novedaz quanto a modelo de lengua més importants que i trobarez ye lo emplego d’un sistema hibrido d’articlos, que creigo que ye la millor opción pa l’aragonés estandar, ya que ye, dende lo mío punto de vista, la més integradera de totas las opcions. Ye decir, es articlos LO, LA, ES, LAS en combinación con O, A, ES, LAS con as preposicions CON e DE.
Eixo e recuperar la grafia historica EIXpa las parablas que empecipian en latin per EX(eixordica, eixuto, eixata, eixolomar per ixordica/xordica, ixuto/xuto, e ixata/xata, ixolomar/xolomar; con tot e con eixo encara b’ha zonas en as que encara se produz esta realización fonetica como Ribagorza e Bielsa). Esta grafía tamién ye la utilizata pa es demostrativos de segundo termen eixa, eixo/eixe, eixas, eixos/eixes, que tamién ye la forma historica como se puet leyer en una ripa de textos en aragonés –e mesmo encara vivo en bella variedat lingüistica–.
Traducir Lo infinito en un chunco a l’aragonés ye estato una fayena desinforme, tot un tour de force, e no només per la extensión d’o libro, sino perque somos charrando d’una lengua minoritaria e minorizata. Charrando claro e raso: un idioma esmicazato, castellanizato, sinse un modelo culto de referencia, e que en buena cosa de lugars, per desgracia, ye extinto u en vías d’extinción. Manimenos, totas las decisions que he preso en esta traducción son estatas bien sospesatas e repensatas. Beluna podrá estar equivocata, pero son fruito d’un enorme proceso de reflexión. Garra solucion s’ha preso alegrement.
«Yera una oportunidat unica pa dignificar la nuestra lengua… e de contribuir, con a mía traducción, a dotar l’aragonés d’un buen modelo de lengua literaria.»
A lo largo d’o libro he habito de traducir textos echipcios, textos d’escritors griegos como Plutarco e Herodoto, romanos como Marcial, Cicerón u Sulpicia, dica Cervantes u James Joyce, pasando per Las mil e una nueiz, cancions de Georges Brassens, un fragmento d’o evanchelio de sant Chuan e bel poema de Borges e Antonio Machado, entre atros. Per cierto, estos dos zaguers, per respeto e admiración, los he deixato en castellano, només ye traducito lo títol. E tamién títols d’obras literarias e cinematograficas.
Un atro problema ye estato cómo trobar la definición exacta pa adchetivos calificativos castellanos, que en aragonés tamién ne b’ha, pero la suya definición encara no ye bien definitta. Pezolaga, matután… son voces corrients en aragonés, pero muitas vegatas nos resulta de mal trobar lo suyo par castellano.
He quiesto con esta traducción, en a que he meso toz es míos conoiximentos, tot lo que sé d’aragonés, meter las bases d’un modelo de lengua equilibrato, digno, rico, literario, integrador, aleixato de traduccions folcloricas e hiperaragonesistas.
Espero e deseyo que lo mío treballo sirva de modelo e d’inspiración pa nuevas traduccions, que buena faltan que fa a l’aragonés, e que sía un buen mirallo pa toz aquels que deseyan fer de l’aragonés no ya la suya lengua literaria si no la lengua d’o suyo corazón.
Esta traducción ye estata posible gracias a tres personas, buens conoixedors de l’aragonés, que m’han aduyato a resolver determinatas dudas: Lluís Xavier Flores Abat, Ángel Luis Barré Saludas e Juan Pablo Martínez. Sinse la suya aduya esta traducción hese quedato infinitament pior.
Quiero acabar estas linias con unas parablas d’Anjel Lertxundi, escritor de qui me declaro fan, en especial d’es suyos asayos sobre lo eusquera: «Si deixamos que la lengua se malmeta, ella nos malmeterá. Si la dignificamos, nos tornará, en pagas, dignidat».
