Francho Nagore Laín, Paco Lanau Buetas, Michel Gil Orleans y Mercedes Peña Azcón recibioron iste reconoiximiento t´a suya trayectoria vital ligada t´a defensa y t´o treballo por a lengua aragonesa.
Francho Nagore Laín, Paco Lanau Buetas, Michel Gil Orleans y Mercedes Peña Azcón recibioron iste reconoiximiento t´a suya trayectoria vital ligada t´a defensa y t´o treballo por a lengua aragonesa. L´año 2024 ha estau o d´a recuperación d´os Premios Arredol. Aquels Homenaches Arredol d´os años 90 se convirtioron en una d´as actividaz historicas d´o Ligallo de Fablans de l’Aragonés, que se celebraban cada 23 d´abril. A Fundación Aragonum ha quiesto reviscolar-los o pasau 29 de chunio en un evento celebrau en l´Agrupación Artística Aragonesa de Zaragoza.
Os premiaus en ista ocasión han estau Francho Nagore Laín, filologo y escritor academico; Paco Lanau Buetas, profesor voluntario en o Ligallo de Fablans de l’Aragonés; y Michel Gil Orleans y Mercedes Peña Azcón, que metioron en marcha y levoron enta debant “La Botiga” d´o Ligallo dende os años 90 dica los 2000.
Con l´asistencia de socios, familiars, y representants d´o mundo de l´aragonés, s´ha homenacheau d´ista traza ra trayectoria vital d´istas cuatro personas adedicadas a la defensa, o estudio, o impulso y a dar visibilidat a la lengua aragonesa.
Dezaga ra disolución d´a Dirección General de Política Lingüística del Gobierno de Aragón, dende o Ligallo de Fablans y a Fundación Aragonum se considera que a recuperación d´os “Premios Arredol” ye especialment significativa y necesaria ta visibilizar l´actual situación de desprotección y ausencia de reconoiximiento d´a lengua aragonesa, fendo consonar a gala y a entrega d´os premios con l´aniversario de constitución d´o Ligallo, o 29 de chunio 1982.
BIOGRAFÍA D´OS PREMIAUS
Francho Nagore Laín.
Figura clau en a defensa y promoción d´a lengua aragonesa. Filologo, mayestro en a Universidat de Zaragoza y autor en lengua aragonesa. A suya carrera ha estau una incansable busqueda por investigar y preservar a lengua aragonesa en a epoca moderna. Estió nombrau academico de numero por o Decreto 122/2021, de 29 de chulio, d´o Gubierno d´Aragón, una honor que destaca o suyo important papel en l´Academia Aragonesa d´a Lengua. Amás amás, ha contribuyiu significativament a la literatura en lengua aragonesa.
Paco Lanau Buetas.
Mayestro voluntario d´aragonés durant os zaguers 10 años, que ha deixau una marca en l´Asociación de Ligallo de Fablans. A suya labor no se limita soque a l’enseñanza, sino que tamién ha estau un defensor incansable d´a lengua aragonesa.A suya luita y compromiso por mantener viva a nuestra lengua han estau eixemplars y gracias a él, muitos han escubierto y valurau ra riqueza d´a cultura nuestra.
Michel Gil Orleans y Mercedes Peña Azcón.
Dende os años 90 dica os 2000, Michel y Merche rancoron y levoron enta debant “La Botiga” d´o Ligallo de Fablans, convertindo-la en una fuent d´ingresos referent ta toz nusotros a día de hue. O suyo treballo los lievó ta puestos como a feria de Monzón, an que o Ligallo ha puesto estar-ie present dende a primer edición gracias a o suyo esfuerzo, a Feria d´o Libro de Zaragoza y tamién en a feria d´Ayerbe. Pero más allá d´a suya labor comercial, destaca o suyo papel fundamental en o voluntariau. L´Asociación de Ligallo de Fablans ha viviu y aconseguiu os suyos obchetivos gracias a o compromiso desinteresau d´a saber-las personas, y entre ellas, Michel y Merche han estau pilars increbantables. A suya entrega y dedicación t´o voluntariau han enfortiu a comunidat nuestra.
