Mes de 20 añadas ensiñando l´aragonés en Barzelona.
A migrazión, chunto con a escuela, han estau os prenzipals aniquiladors de l’aragonés. A primera dixando os lugars vuedos y a segunda machaquiando con fer d’una luenga esferenziada un dialecto d’abarca y sin de futuro. Con tot y con ixo, entre os mils de fablans d’aragonés cal contar con una colla de catalans de radizes aragonesas y aragoneses que marchoron ta Barzelona, Tarragona y redoladas; sin ixublidar-se d’os curiosos que se i meten a estudiar a luenga dimpués de vier uno d’os cartels que Pau, Miguel, Alizia, Arturo u belatra ponen por os zentros aragoneses, escuelas de luengas y zentros universitarios catalans.
O Corrinche ye, pues, un puesto d’alcuentro entre fablans patrimonials que leboron a luenga viva ta Barzelona, de fillos y nietos de fablans que han dezidiu no tresbatir-la y pasar-la ta la siguién chenerazión, d’aragoneses en busca d’a suya identidat, de filofogos encuriosius y d’intresaus por as luengas romanicas.
Os d’o Corrinche sapen bien que as radizes d’a presenzia aragonesa en Catalunya ye tan viella como a istoria d’os dos pueblos. Conoixen as diferenzias, os lugars y pasau común, que ye muito más que o siñal reyal d’as cuatro barras. Y ye que una d’as caracteristicas d’o grupo ye o intrés por ixe pasau. Una d’as actividaz que más remeramos estió a ruta istorica por Barzelona, vesitando a carrera an naixió Agustina d’Aragón, o espital an atendioron á os aragoneses que luitoron en defensa d’a Corona d’Aragón en 1714, as esculturas que refieren a unión entre a casa de Guifré el Pilós con a d’os reis d’Aragón, entre atras y a importanzia de Gaspar Torrente en as bases de l’aragonesismo contemporanio.
O intrés por l’aragonés en tierras catalanas amanixe con o ranque d’a Transizión, l’asoziación d’aragoneses y os zentros aragoneses de Barzelona y de bellas ziudaz d’arredol.. Estió en ixos tiempos cuando emprinzipioron as emisions en Radio Sant Boi d’un programa en aragonés feito por Andrés Castro. Cursos d’aragonés, creyazión d’espazios ta charrar entre os fablans y os que yeran emprinzipiando a charrar-lo.
Toz istos años, amparau con o Centro Aragonés de Barcelona han continau sin reblar os cursez y han creixiu as actividaz culturals con a inquietut cultural d’os miembros d’o Corrinche y dixar en o Centro constanzia d’a presenzia de l’aragonés como luenga pa charrar, cantar y preixinar. Pa isto s’ha contau muitas vegatas tamién con a colaborazión d’a Universitat de Barcelona an l’aragonés ha estau presén en mesas de luengas en periglo chunto con o sardo u o bretón; u an s’ha azercau a las realidaz culturals euscaras y as politicas de recuperazión d’una luenga grazias a la conzienzia popular y politica.
A inquietut por conoixer ha feito que s’aiga tendiu relazions con atros grupos situaus en Aragón y tamién que os corrinchaires aigan convidau a fablans de zonas aragonesas de luenga catalana, asinas como chens d’os lugars an ye complicau esferenziar si charran aragonés u catalán.
A mosica ha estau tamién una d’as ringleras d’O Corrinche. No solo con a vinculazión con chen como Pepe Lera, cantante d’o grupo folclorico La Val d’Echo, u con grupos como Chundarata! y Os Chotos d’Embún, sino tamién partizipando en festivals como lo Despertafolk, aportando entre os corrinchaires mosicas Autor: Asoziazión O Corrinche y platos tipicos d’a gastronomía aragonesa. Ista partizipazión nos ha feito conoixedors d’os floclors y luengas d’atras zonas d’a viella Corona d’Aragón.
Ninguno tiene que pensar que O Corrinche ye una reunión de viellos sesudos. O intrés cultural ye ubierto a fer espazios d’ozio como recorrius cheolochicos d’a man de Pau Arbués; naturals, d’a man de Rafael Vidaller, os tallers de madera de buixo d’Andreu Comas, os viaches ta la Val d’Arán u ta diferens fiestas de carnaval tradizionals de l’Alto Aragón.
Anualmén, con a pausa obligatoria d’o covid, os corrinchaires emos feito una calçofabla en Tarragona, baixo l’abside d’a catedral y as murallas romanas de Tarragona. Creigo que ista trobada ha estau un buen lugar pa cuesionar o grupo, dar-le o toque catalán en a chenta y l’aragonés en a fabla y en as mosicas.
Os fablans de Catalunya muitas vegatas emos sentiu que as cosas no marchaban. Particularmén estió duro vier como l’aragonés se convertiba en lapapip pa os zeribatos que gubernaban en ixe antonzes. Tamién emos mirau con eszeptizismo as divisions entre fablans y estudiosos por o tema d’as grafías esferenziadas. Entre nusatros i hai diferens sensibilidaz, pero predomina la ideya que o que cal ye fer servir a luenga, dar-le presenzia y normalizar-la.
A exposizión móvil sobre l’aragonés estió una d’as actividaz conchuntas d’O Corrinche, y ha recorriu muitos lugars d’Aragón y Catalunya, pa dar a conoixer o pasau y o presén d’a luenga, dignificar-la y fer d’ella uno d’os alazez d’a identidat d’Aragón.
Os zaguers años, a más d’as actividaz normals, como los cursos, trovadas, conferenzias y seminarios, o grupo ye sensibilizau con o tema de recuperar a toponimia aragonesa y ha aproveitau o dominio informatico d’os recursos pa fer-la constar y que no se pierda la memoria de cómo se dizen os nuestros lugars en aragonés.
No queremos rematar sin pensar en o esdevenidero, D’ideyas no en faltan pa continar treballando a nuestra cultura, o nuestro pasau y as nuestras radizes, mirando con preocupazión as polemicas ortograficas, con uellos apenaus por as enerchías malmetidas en ixos menesters en a nuestra tierra, muitas vegatas sin parar cuenta que a millor finca, que son os mozez y mozetas pierden a transmisión interchenerazional y a penas pueden fer dos clases fuera d’oras en poquetas escuelas.
Semos muito consziens, como chen a caballo entre Catalunya y Aragón, d’as renzillas istoricas y actuals entre os dos pueblos. Conoixemos os rezelos aragoneses, a ignoranzia catalana d’a nuestra luenga y tamién semos consziens d’os momentos de luita conchunta de la que fan testimonio as listas d’aragoneses ferius y muertos, que luitoron en a esfensa d’a Corona d’Aragón y os suyos dreitos en 1714 en Barzelona.. Pero tot ixo no ha estau pa nusatros un estorbo pa fer-nos continar en a luita por o legau que os nuestros lolos nos dixoron y no queremos que tienga como triste futuro, fer-le una foto y dixar-lo morir.
