Autor: ANDRÉS CASTRO MERINO
A los agüerros, están los millors diyas pa minchar mazanas asadas. De poner-se debán d’os repalmars, y, escullir las bozes, que en ixe inte deseyas ascuitar Gloria, Alfonsina, Rosa, Herta, Safo… Pierdo la nozión d’o tiempo, rodiau de lo fumo royo-ziresa d’a pipa nueba. S’enrrastra la tarde con la nuei. Plebe, no ye una plebia normal ye lo telón negro d’os teyatros. Biembeniu agüerro bruxo reino d’elfos, fadas y blus.
Soi chafando un camín de fuellas xutas fuellas rotas, cuyo final estará l’olbido o, si han suerte, los prenzipals actors d’una foto, pintura, o un curto poema d’agüerro. Tamién pueden estar, un ricordo de cuan yeran la sombra fresca d’un árbol en la metá d’un trigal, rebutién d’os labios royos d’os ababols.
Entre las planas de beluns libros trobo fuellas xutas, que yo ponié fa tiempos. Si las i recullo, todas chuntas forman un chardín machurríu, que tamién ha la suya polideza.
Rosa de lo zafrán, güespe de los otubres los tuyos brins ocultos a lo brilar de la luna reluzen con la ruxiada de la mañanada ubriendo las suyas puertas bataleras a las abellas.
Dende la finestra alufro como las rosas s’ubren camín a los campos de lo zafrán no bi ha piedá abemos de marchar pa estricallar miles de rosas. Las i recullimos con las mans chupias de frio cuan plegue la nuei lo fuego bistirá los brins de royo y bermego.
¿Qué ye lo zafrán? Brin de ruxiada L’arca de lo tresoro Lamín minchable Didos entintaus con sangre zafranada.
