Juan Pablo Martínez Cortés
Estianyo hemos estau testimonios de muitas “primeras vegadas” pa l’aragonés. Hue tos quiero contar lo proceso que ha levau fa bels meses a la estrena d’Albert, la primer cinta infantil de debuixos animaus con doblache en aragonés, Albert, una iniciativa de l’Asociación Cultural Nogara.
Podemos charrar de tres estrenas, la primera, lo 9 de febrero, cuan la versión en aragonés d’a cinta s’estrenó en a plataforma audiovisual filmin. Bels días dimpués, lo 20 de febrero, teniemos la oportunidat de mirar-nos-la en pantalla gran en o salón d’actos d’o Colechio Mayor Cerbuna, como parte d’a celebración d’o Día Internacional d’a Luenga Materna. Y, finalment, lo día 28 de febrero Aragón TV emitió la pelicula en horario de maitins.
La chenesi d’o prochecto ranca en abril de 2021 cuan, dende Ninogará, la sección d’educación y socialización infantil de Nogara formada per pais y mais que transmiten l’aragonés a las suyas mainadas, se fació un comunicau demandando a las administracions publicas lo doblache de series y cintas infantils en aragonés.
En efecto, los pais y mais que femos servir l’aragonés como luenga familiar con os nuestros fillos hemos sufierto y conoixemos bien las dificultaz provocadas per la falta de recursos bibliograficos, sonoros y audiovisuals dirichius ta lo publico infantil. Y, considerando que la transmisión intercheneracional habría d’estar una d’as prioridaz d’as politicas publicas, pareixe una demanda bien encertada. Debant d’ixa necesidat no satisfeita, dende Nogará se plantió la posibilidat de fer-lo con recursos d’a propia asociación. Pa ixo s’organizó un grupo de treballo coordinau per Chuserra Barrios, qui encomenzó demandando presupuestos y entrevistando-se con bellas empresas d’o sector. Encara que la ideya orichinal yera fer-lo con bella empresa aragonesa, los estudios locals consultaus no manifestoron guaire interés.
Lo contrario sucedió en contactar con a casa Sonilab Studios, un estudio de Sabadell especializau en fer doblaches en castellano y catalán, qui comprendioron decamín la importancia d’un prochecto asinas pa la comunidat de parladors d’aragonés y s’embrecoron en o prochecto.
Tanto dende Sonilab como dende Nogará se teneba clara la importancia de fer un un producto de calidat, y ixo nomás yera posible si lo doblache yera feito per actors y actrices profesionals. Pero claro, ixo tamién nos plantiaba dudas sobre la corrección prosodica y la credibilidat d’o resultau, pus denguno d’os interpretes profesionals yera aragonesofono. Per tanto, yera preciso un treballo d’asesoramiento lingüistico, formación, revision d’as gravacions y la repetición d’as mesmas cuan fuese menister. Tamién se decidió que i partipasen miembros de l’equipo de Nogará como “extras” doblando bel personache secundario u voces de fondo.
La cinta triada estió “Albert”, un largometrache danés de debuixos animaus, dirichiu per Karsten Kiilerich y basau en un libro de Olle Lund Kirkegaard. La pelicula reconta las aventuras d’Albert, un mesache intelichent y travesero que vive en Kellytown y soneya con estar capitán de globo aerostatico. Chunto a lo suyo millor amigo Egon, se troban con una clica de lladres que los embolican pa furtar un diamant. Gracias a lo suyo enchenyo y l’aduya d’una nina feriant, Jumilla, salen d’o contornillo y conoixen a Leopoldus, golet de Jumilla y capitán de globo que lis aduya a tornar ta Kellytown cumplindo lo suyo suenio.
Malas que se decidió la cinta, lo siguient paso estió fer la traducción d’o guion, fayena que coordiné yo mesmo. A partir d’una primera traducción semiautomatica preparada per Chuserra, lo primer paso estió la corrección y adecuación d’a traducción.
En o proceso, aprendiemos muitas cosas sobre la traducción audiovisual que, como podez imachinar, presenta caracteristicas especials. En primeras s’ha de tener en cuenta que en este caso se trataba d’un rechistro infantil. Amás, lo texto charrau y atros sonius (garraspeyos, mosmosteyos, etc.) han d’estar sincronizaus con os movimientos facials d’os personaches. S’ha de tener en cuenta la duración y numero de silabas de cada intervención, si la cara d’o personache se ye veyendo u no, etc. Aprendié que tota esta información ye indicada per medio de codigos en o propio guión, anque la preba d’o cotón estió mirar-me plano a plano la versión orichinal d’a cinta, comprebar si lo texto d’a traducción inicial se sincronizaba de manera natural con os movimientos d’a boca y tiempo en pantalla d’os personaches, y si caleba, mirar d’alcorzar u alarguir lo texto pa que i casase bien.
Cuanto a lo modelo de luenga, se fació una versión en que toz los personaches emplegan un modelo supradialectal prou cheneral, anque dimpués cada actor li puede dar unas ciertas caracteristicas (per eixemplo, pronunciando u no las –r finals). Tamién se fació una segunda versión en que los personaches secundarios charraban con caracteristicas dialectals atribuyibles a determinadas zonas, pero finalment la versión que se gravó se basó en a primea traducción, mas homochenia.
En chunyo de 2022 arribó lo momento de pasar d’o paper a lo soporte audiovisual. Lo director de doblache estió Eduardo Díez, un gran actoraz qui, amás, ye aragonés. En una primera sesión con Jorge Romance, recibió las indicacions relativas a la lectura y pronunciación y s’encomenzó la fayena d’o doblache. En atras sesions, i participoron Edu Laga, Silvia Cebolla, Guillén Tomás y yo mesmo. La resta de sesions de doblache ya las facioron los actors baixo la dirección d’Eduardo.
Cal decir que la experiencia de compartir una sesión de treballo con Eduardo y atros profesionals y la oportunidat de participar fendo lo doblache de bellas voces estió increyible, y fa valorar la dificultat d’este treballo y lo grans profesionals que son.
« …conoixemos bien las dificultaz per la falta de recursos bibliograficos, sonoros y audiovisuals dirichius ta lo publico infantil »
Pus bien, cada cierto tiempo se recibiba una versión parcial montada con bels personaches incorporaus. Alavez, caleba escuitar la cinta con ficancia, con o guión debant, y muita atención a posibles errors de sincronización, pronuncia u d’entonación. En ixes casos, se marcaba lo tiempo y se daban indicacions de cómo correchir la pronunciación, la entonación, u se cambiaba lo texto pa facilitar la sincronizacion. Con esta información, los actors tornaban ta lo estudio a fer los “retakes”, que son las repeticions d’os planos que cal amillorar.
Ya dende la primera versión parcial, podié columbrar que lo resultau sería excelent. Los actors y actrices de doblache profesionals daban vida verdaderament a personaches aragonesofonos creyibles. Per cierto, ya tos he dito antes que bels miembros de l’equipo de Nogará faciemos bel “cameo”, fendo de extras con bella voz u bel soniu de fondo. Pero qui se reveló como una gran actriz de doblache estió la nuestra televisiva Silvia Cebolla. De feito, qui haigaz visto la cinta, de seguras que habrez identificau que ye ella qui fa la voz de Jumilla.
Tos he de confesar que sintié muita emoción la primer vegada que podié mirar la cinta doblada a l’aragonés. Ixa emoción encara se veyió mas agrandida cuan teniemos la oportunidat de veyer-la en pantalla de cine. Si hez puesto veyer la cinta, soi seguro de que habrez experimentau ixe mesmo sentimiento. Estoi que, como yo, hébaz soniau bella vegada con la posibilidat de veyer cine en aragonés. Esperemos que esta iniciativa de Nogará tienga seguimiento per parte d’empresas y administracions, y en tiengamos luego mas oportunidaz.
Pa rematar, tos recuerdo que Albert sigue disponible en aragonés en Filmin. Tamién i habrá procheccions como las que, gracias a la Comarca Comunidat de Teruel s’han feito en diferents lugars d’ixa comarca. Y, dende Nogará se quiere fer los posibles pa que los centros escolars puedan organizar procheccions d’a cinta.
