empenta ra conservación d´as BODEGAS EN TOZAL, siñal d´a tradición vinicola d´a comarca
Vicente Miguel Chueca Yus
Durant a Edat Meya, a tradición vitivinicola continó en a comarca, en primeras baixo dominio musulmán y dimpués cristiano. Encara que os musulmans no consumiban vin, cautivaban viñas ta fer servir as ugas y o mosto en alimentos y bebidas. Con a Reconquiesta, a labranza d’o vitau s’intensificó dende o Monesterio de Veruela, asentando-ie una tradición que perdura dica hué.
A vendema ha cambiau en o tiempo: dica os años cincuanta, se realizaba entre meyaus d’octubre y Toz Santos, pero hué encomienza en a primera metat d’octubre, y en o caso d’as ugas blancas, en as zaguerías d’agosto.
De bodegas tradicionals en a comarca, en i existen 3 tipos: As ubicadas en castiellos, como la d’Ambel, as que se troban baixo as casas, en localidaz como Borcha y Magallón, y as bodegas en tozals, excavadas en os arredols d´os lugars como Tabuenca y Maleján, integrando-se en o paisache.
En as bodegas, a uga se ficaba en lumbreras t´arrivar a la pisadera, do se pisaba y o mosto fluyiba ta un “pocico”. Luego, o vin se cambeaba ta cubas ta la suya fermentación, un proceso que duraba de 15 a 20 días y que cheneraba tufo, un gas perigloso. As cubas se vaciaban malas que floreixe-se o vin, fendo servir ferramientas como as tinetas y as gamellas. Dimpués, o vin s’almagazenaba en pipas u tonels, y a “bisa” sobrante se tresladaba ta una prensa ta extrayer-ie o vin restante.
« …as bodegas en tozal, excavadas en os arredols d´os lugars s’integran en o paisache… »
O vin y o suyo papel
O vin ha teniu un papel simbolico y trascendental en a vida humana, asociau a momentos importants como a naixencia, bodas y ceremonias relichiosas. As bodegas tamién han estau puesto de reunión social, especialment ta chentas y brendas. Amás, en ellas se realizaban chuegos, fendo d’istos espacios un puesto de convivencia y entretenimiento.
Prochecto de conservación
En 2019, a Ruta d’a Garnacha lanzó un plan ta conservar as bodegas en tozal, un patrimonio emblematico d’a cultura d’o vin en a comarca. O proyecto, inicialment planiau ta 2019-2021, se apolargar por a pasa y a falta de recursos, pero se reactivó con mesas de treballo que bi involucroron a distintos actors, dende politicos y empresarios dica ra ciudadanía.
Conclusión
O 30 de chunio de 2024, y con motivo d’o Día d’o Paisache, se presentó una publicación que replega tota ra conoixencia y as millors practicas obtenidas a ro largo d’o proyecto, amás de casos d’exito y asesoría tecnica. Ista guía, endrezada ta monecipios con bodegas en tozal, proporciona endreceras claras, motivando y facilitando a ras entidaz locals o treballo de conservación y mantenimiento d’iste valuoso patrimonio, tanto material como inmaterial.
