Fernando Lampre. Nabesaires
A Sierra Pelarda u de Fonfría
Istos relieus forman parte d´a Cordelera Iberica y s´arixen entre as capeceras d´os ríos Huerva y Auguasvivas, a o norte, y a cuenca d´o río Pancrudo -afluyent d´o Xiloca-, a o sur. A suyas montañas s´expanden de NU enta SE a ro largo de bels 20 km de longaria, con altarias importants, encara que as suyas tucas, suaves y alomatas, no poseigan guaire personalidat u relevancia paisachistica: o Marojal (1.486 m), a Pelarda (1.512 m) y a Retuerta (1.492 m), como sí ocurre con as suyas rallas vecinas de Cucalón y Oriche, caracterizadas por parez rocosas y zinglas calsinosas de gran continidat.
A vertient meridional d´a sarra, que nos concierne en ista cursa, i amaneixe surcada por buena cosa de clamors, ramblas y rieras que baixan enta o Pancrudo, travesando as localidaz de Collados, Valverde, Olalla, Cutanda, Nueros, Godos, Torreciella y Villanueva del Rebollar. Si a ista siñal l’aunimos que a Pelarda ye construyida por un sustrato detritico d´o Terciario (conglomeratos, piedras d´arena y buros d´o Paleocheno), podemos concluyir que istas rocas proporcionan una inchent cantidat d’ensidadura d´as “botinadas” u “tamborinadas” que en baixan, dimpuesas de fuertes torrombescas u precipitacions, por ramblas como la d´o Sabinar, por a que transitamos una buena parte d´a cursa.
En o cobalto d´a sierra se presenta un recubrimiento vechetal de caracter arborio con un magnifico mosaico de pinars, fruito d´antigas repoblacions que s´han naturalizau, como la d´o pinar de Torreciella (más de 100 años), que i conviven con os zaguers y valiosos retallos d´a vechetación autoctona, carrascals y caixicars de borrosta, que han propiciau que a sierra sía catalogada como Zona d’Especial Conservación (ZEC) por a Unión Europea. Manimenos, entre totas istas masas forestals destaca una: en o pedero d´a sarra se troba un valioso y singular ecosistema, obcheto d´a nuestra visita: o Sabinar d’Olalla.
Sintesis d’a cursa: 6,5 km. 50 m pandera d’ascenso, 100 m de descenso 1. Arrivada en autos t’a localidat d’Olalla (1.138 m) 2. Andada a pìet dende Olalla ent’o Sabinar d’Olalla (1.085 m) 3. Per a Rambla d’o Sabinar y Carrapardillos, cursa dica Cutanda (1.060 m), con vesita a la localidat, a o suyo castiello y os suyos peirons. Dimpués d’a chenta, vesita guiada d’a man de José Enrique Lobera, t´o Centro d’Interpretación d’a Baralla de Cutanda.
Escomienzo d´a cursa en Olalla
En o matidero d´a sarra Pelarda, sobre un estreito tozal que bi actúa como divisoria entre dos clamors que descienden dende ra mencionada montaña, s’ubica Olalla (1.138 m de altaria, localidat anexionata en 1971 a o monecipio de Calamocha. Dende a Edat Meya y dica o sieglo XIX, formó parte de l´antiga Sexma de Barrachina, en a Comunidat d´Aldeyas de Daroca. En o cobalto d´o casco urbano destaca una polida torre mudéjar, de rechola, d´o antigo templo parroquial o unico repui que en queda. Ye d´o sieglo XVI y tiene cinco cuerpos. O inferior ye de planta cuadrada y sobre iste se´n devantan cuatro más octogonals: o primer ciego, os dos siguients con vanos de meyo punto doblaus, y o zaguero, más chicot y con oculos. A decoración mudéchar ye de rombos y tracería, con utilización d´o ladrillo resaltau. Ent´a part baixa d´o lugar bi ye ra actual ilesia parroquial (sieglo XVIII), Santa Olaria, un edificio de mampostería de tres naus y crucero. De torres no´n tiene. Sobre o suyo tellau a cuatro auguas destaca o tambor octogonal d´o crucero.
Sabinar d´Olalla
Nos trobamos debant d´uno d´os bosques más viellos y millor conservaus de sabina albar (Juniperus thurifera) d´Aragón. O sabinar d´Olalla se troba a bels 1.100 m d’altitut y ocupa bellas 275 hectárias. Ye travesau por a rambla d´o Sabinar, que desciende dende a sierra Pelarda u de Fonfría. O relieve que rodia o sabinar ye farchau por pueyos buralencos, suaves costeras y vallons que, fueras d´o espacio arbolau que nos ocupa, son deforestadas y mesas en cautivo. Somos debant d´un bosque ubierto u feito bobaral, formau por grans sabinas centenarias, de polidos trallos retuertos, deseparadas unas d´atras por praus que yeran utilizaus de forma tradicional como puesto de pasto comunal t´os abríos (boalar u bobaral). A-saber-los arbols tienen a cocoroza deformada por as antigas bribadas (a fuella tamién s´emplegaba como forrache). En bellas redoladas creixen carrascas y caxicos entre ras sabinas.
A sabina hué tiene una distribución cuasi relicta -por ixo ye tan valiosa-, pero antismás s´espardiba por a metat oriental d´a Peninsula Iberica -especialment en l´ambito d´a Cordelera Iberica, as montañas de l´Atlas, Corcega y os Alpes Provenzals, con rangos altitudinals que van dende, si fa u no fa, os 200 m -en los Monegrosta os 3.000 m en l´Atlas, en pasando por os 1.000-2.000 m d´os sabinars turolenses. Habitan en ambients continentals, ixecos -puede tolerar as sequeras extremasy luminosos, con diferencias termicas que pueden oscilar entre os -25º d´hibierno y os +40º d´o verano. Ye obvio que fablamos d´un arbol resistent y resilient, cereño y de lento creiximiento -a suya fusta ye imputrescible-, que puet alcanzar una lonchevidat extraordinaria -talment t´a nuestra memoria acuda a conoixida sabina de Villamayor, cerqueta de Zaragoza.
Arrivada a Cutanda
Cutanda ye conoixida en os albors d´Aragón por a celebre victoria d´o rei Alifonso I sobre l´exercito musulmán, en l´año 1120. O lugar se troba a l’abrigo d´o tozal d´o castiello, situau sobre a marguin zurda d´a rambla d´a Riera, que desciende dende ra sierra Pelarda y Olalla. Aquel castiello, d´orichen musulmán, pasó dezaga ra suya conquesta por diferents tenents vinculaus a os siñors de Belchite, dica rematar en mans d´o Arzobispado de Zaragoza. Tornó a asumir funcions defensivas en os sieglos XIV-XV, durant as guerras entre Aragón y Castiella y, probablement tamién durant as guerras carlistas (sieglo XIX). As suyas ruinas actuals son soque un sucherent muro de mampostería recubierto de sillars a o exterior, de 12 m de longaria y 2 m d´espesor. Se i conservan os foraus de dos puertas y as rancanzas d’unas vueltas interiors.
Pero, sin de duda, ye a baralla de Cutanda a que centra, d´a man d´os míos compañers, a zaguera armiella d´ista sucherent cursa d´o Club d’Ocio y Tiempo Libre de Fablans…
