Andrés Castro Merino
Cuan a la rematanza d’a decada d’os güitanta d’o sieglo pasau, me i posé en contauto con diversas personas d’a emigrazión aragonesa a Barzelona, pa fer un poder de dar visibilidat a la cultura aragonesa, dixando a un costau lo topicazo d’o Pilar, lo cacherulo, la jota y la nobleza baturra. Una d’ellas estió Anchel Conte, la suya respuesta: freda, negativa. No i quereba saper cosa d’ixe nuevo proyeuto cultural. Sin dembargo, atro gran escritor d’a nuestra tierra, Desideri Lombarte, veyó con güenos uellos dito intento, que remató fructificando en lo Rolde Aragonés de Barzelona.
Comenzipiaron charradas, esposizions, publicazions, programas de radio. Prezisamén, a traviés d’un oyén d’o programa “Charrando d’Aragón”, d’a emisora municipal de Sant Boi de Llobregat, sozio d’o Centro Aragonés de Gavá, Chusé Lois Montoliu (a la llarga miembro d’a colla musical Chundarata), mos animó a realizar un curso d’aragonés a lo suyo zentro. Asinas, que a lo 1996 comenzipió iste camín, que por agora, aspero que no tienga rematadura. Esito de raso, un camatón d’alumnos, con Manuel Marqués de profesor. A l’ora de contar con bel escritor, pa dar una charradeta, se fabló con Ánchel y azedió a venir una tardi. Ta él, estió un chute d’enerchía, tota aquella mozardalla intresada en la lengua aragonesa.
De Gavá pasemos l’año siguién a Barzelona, a lo Centro Aragonés d’a carrera Joaquín Costa. De nuevas Manuel Marqués de profesor, y atra vegada la mesma situación, trucar a Ánchel, pa comentar la suya obra y l’estau d’a lengua. Antiparti, s’abeba presentau lo suyo libro “O rafe de l’espiello”, a lo salón d’actos en unas chornadas culturals. A la fin, la cantidá de chen, prevocó la nezesidat de partir los cursos en dos rans. Alazetal: Manuel. Y, l’afundamiento? Qué femos? Con muito ficazio, conversamos con Ánchel pa veyer, si quereba, podeba, le veniba bien estar lo responsable. A debán d’a nuestra alegría azedió. Yera lo 1998.
Ánchel Conte siempre estió un brin cretico, con los cursos d’aragones que se i feban en Aragón, pues deziba, que bels coleutivos politicos, emplegaban la fabla aragonesa, pa fer proselitismo, construyindo con la lengua una bandera de diferenziazión, cara ta los demás pueblos d’España, en un intento d’esfender un nacionalismo, cual conzeuto, él no compartía pas.
Pero lo cariño, l’abrazo, que i trobó en Barzelona, en toz aquellos que yeramos intresaus, preocupaus, por la situación d’a lengua aragonesa, l’apercazó de tales trazas que estió lo nuestro profesor varios años.
Deziba Anchel a lo Siete de Aragón, que no sabeba bien porque iba a fer lo curset d’afundamiento.
“Pues no lo sé, ganas de triballar. Sin tener-las!, pero esenzialmén m’ha empentau a ilusión que teneba a chen con l’aragonés cuan benié l’añada pasada a lo Centro Aragonés a presentar o mio libro “O rafe de l’espiello”. Biyé muita chen que sabeba bién l’aragonés. Aspero que disfruten fendo o curso, que beigan que l’aragonés ye una lengua literaria, que puede estar una lengua zientifica, y que, por denzima de as modalidaz dialeutals, existe una fabla culta con la que nusatros traballaremos en os cursez.”
