José Enrique Lobera Traín
A fuga y proliferación d´as recreacions historicas nos obliga a considerar-las como un evento cultural y festivo con entidat propia y con a suyas propias peculiaridaz. O turismo cultural tien cada vegada más aceptación. Os debates y polemicas impregnan o fenomeno cultural y turistico d´aquellas, cada vegada más de moda, y en particular sobre o suyo rigor historico, a calidat d´as representacions, as identidaz que expresan, o suyo impacto economico a suya antigüedat, etc., tot isto nos leva a deseparar as recreacions en dos grupos diferenciaus:
• Fiestas historicas
• Recreacions historicas.
Fiestas historicas
En as fiestas se trata de reconstruyir l´acontecimiento historico clau como reclamo turistico, en o que predomina l´aspecto ludico y festivo. Os participants se visten d´epoca -con más u menos, más bien menosrigor historico y completan o gancho con ferias d ´artesanía u mercaus falso-medievales. Iste modelo i traye a buena cosa de visitants de vez que facilita ra participación d´os naturals u vinclaus con a población. Iste modelo posibilita un important impacto economico. A España Vaciada solo tien dos posibilidaz ta agarrapizar-se a o futuro: Paisaches y Patrimonios historicos… y no puede desaproveitar-ne garra. Han d´estar capables d´organizar varios cabos de semana con tallers, conferencias, lifaras ta replegar fondos o talment conciertos. No se puet proyectar tal cantidat de treballo ta que solo brille en dos días.
A sobén, ta preservar a esencia de l´acontecimiento, as fiestas achustan grupos Recreacionistas ta divulgar o verdader megollo de l´acontecimiento historico.
Recreacions historicas
Son bien documentaus os acontecimientos historicos claus en a población, u ra comarca, ta os que a ra vestimenta y o material que la complementa se les presta tota l´atención. En istos casos son muitos menos os que s’aganan a vestir-se d´a epoca, pues o rigor y o treballo de reconstrucción que exiche disuade a beluns de participar-ie. No almiten os mercadiellos encara que pueda almitir-se-ie a bel artesano. La falta de mercadiello condiciona ra visita de turistas, istos los troban a faltar a l’hora de completar o día en a población. O gasto en bars y restaurants se resiente.
Os grupos recreacionistas s´estiman más d´as Recreacions que no de ras Fiestas Historicas, son partidarios d´o rigor y calidat con menos turismo frent a más turismo y menor rigor historico. Igualment unas e atras son fiestas populars, tanto como puedan estar as patronals, as relichiosas u belatras similars.
Dende o mio costau tanto unas como atras, por deseparau, no son o modelo ideyal. Una FIESTA/RECREACION HISTORICA, en a mía opinión, ha de tener os siguients obchetivos:
• Dar a conoixer l´acontecimiento historico.
• Que no solo se desembolique en un cabo semana.
• Que o nivel d´implicación/participación d´a población local sía muit alto.
• Que o turismo que bi atraiga sía, como poco, equiparable a ras fiestas patronals.
T´aconseguir istos obchetivos podríanos:
a. Potenciar actividaz relacionadas en municipios vecins.
b. Relaxar a exichencia de rigurosidat encara que siempre s´apunte enta ella.
c. Reconoixer a rigurosidat, con bel premio, toz os años.
d. Os mercadiellos y os artesanos han d´estar presents siempre que no carrusqueyen masiau.
e. Desembolicar actividaz complementarias a ro largo d´o semestre previo.
Toz istos puntos han d´estar consideraus por os vecins, antes que no acotraciar os actos en una Recreación u Fiesta Historica.
