A mosica ye una ferramienta fundamental pa difundir una luenga, y l’aragonés no i ye una excepción.
Este ye un d’es obchectivos d’O zaguer chilo: fer vistero y normalizar l’uso de l’aragonés, tamién en a mosica actual.
O zaguer chilo ye un prochecto que surte d’a man de varias socias de l’Asociación Cultural Nogará y atras personas afins. En un primer momento se pensó en un disco recopilatorio con cancions ya gravadas. Pero pasau un tiempo, ixa ideya fue cambiando y se decidió d’ir una mica dillá, y convidar a grupos a que gravasen en aragonés un nuevo tema, u reeditasen en esta luenga cancions ya gravadas. Esto suposó un verdadero reto pa totas, ya que calió traducir y adaptar letras, achustar metrica, aprender a pronunciar…
Un treballo gravau con o siello Delicias discográficas en o Laboratorio Audiovisual d’o Centro d’Historias de Zaragoza, y un cudiau disenyo d’a portada y o libret, que tienen cada anyo una autora diferent, pus queremos que s’embreque en o prochecto contra mas chent millor.
5 discos levamos ya, y un seiseno que ye agora en o furno, con vinte cancions en cada CD de grupos de tot Aragón y de totz es estilos mosicals: dende Manolo Kabezabolo dica María José Hernández, pasando per Carmen París, Los Gandules, China chana, Esparatrapo, Bosnerau, Lurte, Krevi Solenco, Nuei, Dadá, Azero, Juako Malavirgen, Elem, La Ronda de Boltaña, u a magnifica voz de Viki Lafuente.
Ye un prochecto ubierto a qualsequier grupo aragonés que quiera participar-ie. N’ha feito parte grupos bien contrastaus, con atros que encara nian teneban nombre. Un eclecticismo y una mescla de grupos y estilos que fan mas gran encara a l’aragonés, amostrando que i culle tot. Con esta edición serán ya 120 es grupos que han participau en O zaguer chilo. A disco per anyo dende 2017, ye un prochecto ya bien consolidau en o panorama mosical.
Un esfuerzo y ilusión que s’ha visto present en cada un d’es conciertos y presentacions que hemos feito, contrimostrando hue mas que no nunca que l’aragonés ye bien vivo.
En esta seisena edición van a participar-ie: Ángel Petisme, Zobux, La Máquina de Turing, Os Fillos d’o Sobrarbe, Big Head Down, Almendra Garrapiñá, Belchite, Psychophonicos, Viki and The Wild, Rikmo & Lasko, Water violet, Ixo Rai!, Varosvan, The Magnetophones, Crebazando Muros, Chera Social Sound, Herizo, L’Aventadero, Franchi Del Desierto y Titiriteros de Binéfar.
Es discos los podetz trobar en a nuestra siede de Pza. Asso de Zaragoza, u tos podetz meter en contacto con nusatras en es nuestros retz socials.
Pa mas info: asociacion@nogara-religada.org
