Direutor Cheneral de Politica Lingüistica d’o Gubierno d’Aragón
Valurazión d’a faina desembolicata en a Direzión Cheneral de Politica Lingüistica
Yera nezesaria ra creyazión d’una direzión cheneral de politica lingüistica?
A competenzia sobre as luengas propias ye a cuarta que estableix o Estatuto d’Autonomía d’Aragón, d’as 60 que son esclusivas, nomás por dezaga d’as instituzions de l’autogobierno y o dreito aragonés. Que no esistise en Aragón una direzión cheneral ta chestionar a politica lingüistica yera una anomalía sobre a cuala ya eba clamau l’atenzión mesmo o Consello d’Europa. Se trataba d’a unica Comunidat Autonoma con luenga propia que’n mancaba d’ella, o que suponeba que no se levaba a cabo garra politica publica de protezión y promozión de l’aragonés y o catalán d’Aragón.
Qué situazión bi eba en l’inte de meter-la en marcha?
En o presupuesto de 2015 cuan se creyó, i eba una partida de 15.000 euros en a Direzión Cheneral de Patrimonio, que no s’eba emplegau y que, mesmo, cuan demandemos que se nos achudicase ta tener bella cantidat ixe año s’escubrió que eba estau tresladada a unatro conzeuto. Ye dezir, a inversión d’o Gubierno d’Aragón dica a creyazión d’a Direzión Cheneral yera zero.
Ha trobato resistenzia ta meter en marcha a direzión cheneral?, las ha abitas en o mundo de l’Aragonés?
Por parte d’o gubierno no, evidenmén. En cambio, os grupos de Ciudadanos, Vox y o PP d’as Cortes han pediu en as Cortes, reiteradamén, a suya supresión. De feito, cada año la eliminan en as suyas esmiendas a la lei de presupuestos. Se da a paradoxa que o PP se manifiesta espresamén a favor d’a protezión d’as luengas propias, y a que se leve dende a Direzión Cheneral de Patrimonio, pero cuan plegan os presupuestos, en as suyas esmiendas, en cuenta de trespasar-lo a patrimonio, destina toz os diners a infraestruturas u a la enseñanza conzertada.
En o “mundo de l’aragonés”, i eba una gran espeutativa y creigo que estió bien acullida, y o tiempo ha contrimostrau que yera nezesaria.
Qué linias d’autuazión s’han desembolicato?
Dende o prenzipio s’ha treballau en dos linias fundamentals, por un costau, a ensiñanza y por unatro a promozión y difusión. Istos son os dos grans bloques de treballo en os cuals s’engloba tota a nuestra autuazión dende febrero de 2016, que ye cuan teniemos un presupuesto y personal, dau que a direzión cheneral naxió sin una cosa ni l’atra, como ye lochico con un presupuesto que ya yera en marcha. O treballo ha estau inmenso, y puede veyer-se en a web lenguasdearagon.org.
Cuáls son as autuazions que vusté estacarba?
En materia educativa, a consolidazión d’a ensiñanza d’o catalán, con a creyazión de plazas por primera vez en as plantillas organicas d’o departamento; respeutive a l’aragonés a duplicazión d’o numero de zentros en os cuals s’amuestra y tamién d’o numero d’alumnos, y a cuasi triplicazión d’o numero de profesors. Amás, a normativa que permite a ensiñanza d’a luenga como veicular y a posibilidat d’obtener, en o caso de l’aragonés, zertificaus dende l’A2 a lo C1.
En materia de promozión, creigo que ye de destacar a colaborazión con atras instituzions: a Universidat de Zaragoza, as Comarcas y os Conzellos, asinas como os convenios de colaborazión siñaus con cuasi 60 entidaz, sindicatos y asoziazions empresarials.
Finalmén, a elaborazión de ferramientas teunolochicas ta l’aragonés, d’as cualas as más representativas son l’Aragonario (dizionario) y o TraduZe (traductor automatico). Fa uns días dábanos a conoxer que istas ferramientas eban teniu cuasi 5 millons d’usos.
En o tocán a l’amostranza de l’Aragonés, cuál ye estato ro papel d’a direzión cheneral, e qué abanzes podemos estacar en ista demba?
Como deziba, sobre tot l’incremento exponenzial d’o numero d’alumnos y dozens, pero tamién a estensión en o territorio, que autualmén plega a prauticamén tot l’Alto Aragón. Ha de tener-se en cuenta que a ensiñanza ye voluntaria, por o que l’asignatura ha d’estar trigada por as familias, y concorren muitas zircunstanzias que no siempre aduyan.
Por unatro costau, a creyazión de materials didauticos, una demanda istorica d’os mayestros. A mayoría d’els son online en a nuestra pachina web. Amás, os mayestros tienen, en a nuestra web, una intranet ta compartir materials, y tamién se recuperoron os seminarios de profesors que s’eban eliminau en a lechislatura 2011-15.
D’espezial importanzia ye a normativa que regla os proyeutos lingüisticos que, como ya he dito, permite que s’utilize a luenga con caráuter veicular t’atras asignaturas. Isto prenzipió en a Vall de Benás, l’Alto Gállego y a Val de Echo, y permite a los alumnos que cursan l’asignatura obtener un zertificau correspondién a lo Marco Europeu de Referenzia ta las Luengas a la fin de cada etapa.
Finalmén, creigo que ye mui importán a creyazión en o grau de Machisterio d’educazión infantil y primaria, d’a menzión de luenga aragonesa. D’iste modo i abrá mayestros espezialistas en aragonés ta cubrir as plazas d’ista asignatura.
Troban colaborazión d’os diferens organismos d’a DGA embrecatos en a posa en marcha d’as clases d’Aragonés en os colechios?
A fayena no siempre ye fázil, venimos d’una tradizión que consideraba a l’aragonés bella cosa residual, cuasi aneudotico y extraescolar. A colaborazión con as direzions chenerals d’educazión ye total, pero ye zierto que, a vezes, en cualques zentros agún esisten retizenzias, que a bonico se’n van venzendo, espezialmén cuan os dozens encomienzan o suyo treballo y tota a comunidat escolar veye que se trata d’una asignatura como as de demás y que ye importán ta la conoixenzia d’a nuestra realidat cultural y sozial.
Cómo valura de forma personal a suya etapa en a direzión cheneral de politica lingüistica?
Ta yo ye estando una etapa mui enriquidora que, amás, m’ha permitiu conoxer con mayor profundidat a situazión real de l’aragonés y o catalán en o territorio.
Tamién m’ha permitiu conoxer de primera mano os problemas internos que sofre cadaguna d’as luengas.
Ye espezialmén doloroso observar a falta d’alcuerdo entre os distintos actors, que agora mesmo, ye o prenzipal problema que tiene, sobre tot l’aragonés, ta desarrollar-se.
Si en istas dos lechislaturas (ueito años) que concluyen en 2023 toz esen “remau” en a mesma direzión s’ese abanzau o dople. A iste respeuto ye mui interesán o treballo d’os soziologos Eito y Marcuello en o cual describen zientificamén os problemas d’egos que esisten en o que clamamos “o mundo de l’aragonés” que, manimenos, nomás los trobamos en o mundo asoziativo urbano y que son de raso allenos a la realidat d’a luenga en os suyos territorios en os cuals se conserva.
Ta millorar ista situazión emos siñau alcuerdos de colaborazión con cuasi 60 asoziazions, con conzellos, comarcas, sindicatos y entidaz empresarials. Destaco tamién o programa Agora x l’aragonés en a cuala son más de 100 interpresas, una trentena d’instituzions, atras asoziazions y cuasi 1.000 personas a títol particular.
